حتى لا تصابوا بالملاريا !!!

شنداوي فضي

بسم الله الرحمن الرحيم

الناموسية المشبعة

ال

1/ عندك ناموسية مشبعة ؟

نعم

ألف مبروك دى أحسن حاجة عملتها عشان تحمى نفسك و أسرتك من الملاريا، أنت عارف إنو لسعه واحده من البعوض كافية عشان تنقل الملاريا وطالما عندكم ناموسية انتو واحدة من الأسر المحظوظة والمحمية 100%.

2/ ممكن تحمى نفسك وأسرتك من الملاريا إذا كان كل واحد منكم عندو ناموسية مشبعة بينوم فيها كل يوم بالليل وخاصة في فصل الخريف والشتاء ودى الفترة البتكتر فيها الملاريا.

3/انتو عارفين... انو المفروض اى طفل عمرو اقل من خمسة سنين واى مراة حامل لازم ينوموا تحت ناموسية مشبعة كل ليلة وخاصة فى فترة الخريف و الشتاء عشان ما تجيهم ملاريا ومضاعفاتها اللي ممكن تتسبب في الوفاه اذا ما اتعالجت بالصورة الصحيحة.

4/ معليش يمكن يكون تركيب الناموسية كل يوم ممل شوية لكن اتذكر معاى الحمي، الصداع، الام المفاصل الاستفراغ، الغياب عن العمل واحتمال الموت بسبب الملاريا حتلقى انو تركيبها أسهل وأحسن.

5/اذا استعملت ناموسية مشبعة تنوم تحتها كل يوم حتكون وفرت قروش كتيرة ممكن تفقدها بسبب ألإصابة بالملاريا و فى الفحص والعلاج و الغياب عن الشغل وبرضو تكون حميت نفسك من انك تعانى من مرض الملاريا

6/ انت عاوز ترتاح من الملاريا ؟ ....

نحنا عندنا الحل .....الناموسية المشبعة.... تحميك من الملاريا وتوفر مالك و تريح بالك.

7/ علشان تضمن فاعلية ناموسيتك المشبعة لازم تعيد تشبيعها مرة ثانية بعد مرور ستة شهور من بداية استعمالها او بعد ثلاثة غسلات ولوعايز تعيد تشبيع ناموسيتك ، اتصل بإدارة مكافحة الملاريا بالولاية.

رسائل العلاج:-

1/ أنت عارف... انو الزول لمن يحس بي أعراض الملاريا مفروض يمشي يتعالج من بدري.... كدا يكون كافح مرض المالملاريا ودا مابيخلي الملاريا تعمل مضاعفات.

العلاج المزدوج طريقك للمعافاه وتجنب مضاعفات الملاريا.....

2/ أديك البشارة دي....

علاج الملاريا غيروه من الكلوركين إلي العلاج المزدوج بعد بحوث ودراسات كثيرة.

يبقي طوالي الزول ياخد العلاج المزدوج لمن تجيه الملاريا وبالطريقة الصحيحة.

3/ مرض الملاريا ممكن يعمل مضاعفات ذي هبوط الضغط والحمي الشديدة والتشنجات واليرقان والفتور الشديد وكدا الزول بتكون عندو ملاريا خبيثة وداير طوالي نوديه للدكتور في أقرب مستشفي لمن تظهر أي واحدة من المضاعفات دي.

هام جدا:-

1/ العلاج المزدوج طريقك للمعافاه من الملاريا

2/ الإسراع بالمريض الي اقرب وحدة صحية يقلل من خطر مضاعفات الملاريا التي تؤدي للوفاة.

3/ الناموسية المشبعة، من الملاريا تحمي عيالك وتريح بالك وتوفر مالك.

4/ الناموسية المشبعة هي طريقك الأمثل لحماية نفسك وأفراد أسرتك من مرض الملاريا.

وأهم حاجة ياجماعة ونحن الأيام دي في فصل الخريف وشايفين البرك والمستنقعات..... انا ما عاوز الناس تعتمد اعتماد كلي على المحلية ولازم الناس في الأحياء يتحركوا بتجفيف البرك الصغيرة .

والبرك الكبيرة بس لو كبينا في زيت رجوع بتاع العربات حا نقتل يرقات البعوض وبالتالي نحمي نفسنا من الملاريا ودي حاجة بسيطة جداً وما مكلفة بس كيف الشباب في الأحياء يتحركوا.

ربنا يجعلها أمطارخير ويحمينا من شر الملاريا

المدير العام

لك التحية علي البداية الجميلة ومنتظرين منك الكثير د. طارق