كونان شنداوي فضي
| موضوع: عفيت منك يا بت الرجال الأربعاء يوليو 22, 2009 9:36 pm | |
|
قبل ما تقرا القصة اريد ان اقول ليك القصة حقيقة
تصدق او لا تصدق
ليلة الدخلة
شاب موظف وضعه المالى ممتاز قرر الزواج---
بعد مشاورات مع الاهل ذهب وخطب ليه بت
بت ناس وتمت الخطوبة والعقد والزواج
بعد الحفلة اخذ عروسته وذهب الى الشقة التى
استاْجرها لقضاء شهر العسل 000
لم تمضى دقائق من دخوله الشقة
الا والموبايل يضرب ---العريس بينو وبين نفسو
مين المزعج وعديم الاحساس البيضرب فى الوقت دا
----الو
---وين يا فردة الف مبروك بيت مال وعيال ان شاء الله
---ديل انتو يا وهم مالكم ما جيتو الحفلة
---العربية اتعطلت فى الطريق واتاْخرنا فى تصليحها وحين وصلنا الخرطوم وجدنا الحفلة انتهت وانت ذهبت بعروسك المهم الف مبروك ونتقابل بعد شهر العسل يا عسل نحن راجعين ود عشيب طوالى
---ترجعو بى ليلكم دا كيف اتعشيتو
العشاء ما مشكلة نتعشى قدام
----وحياة الله وعلى الطلاق تجو تتعشوا معاى
---يا زول طلاق شنو انت مجنون شوف شغلك ونحن بندبر حالنا
المهم العريس كان عنيد وراسه قوى اصر عليهم يجو
ووصف ليهم الشقة وصف دقيق
العريس للعروس دقائق ماشى السوق وجاى سريع وطلع خلاها تبحلق فى عيونا
ما فاهمة حاجه وظنت انه ماشى يجيب سندوتشات من الكافتريا التحت--
بعد قليل رجع العريس محمل بالاكياس الكبيرة
--- سجمى دا شنو
--- قومى سريع سوى الاكل دا الجماعة قربو يصلو
العروس مطيره عيونا اكل شنو البعملو
--- اكل للضيوف الجاين
----ليه ما جبت ليهم عشاء جاهز يا تو عروس بتشتغل يوم العرس
---المنطقة كلها كافتريات عايزانى اْعشى عشرة اشخاص قطعوا 400كيلو متر
بفول وطعمية دى والله تكون فضيحة عديل --قومى
--- لكن
لكن ما لكن قومى سريع
المسكينة دخلت المطبخ وانزرعة بين اللحمة والبصل والتوم والطماطم
فترة قصيرة الشقة كترابتا قامة ريحة البصلة تجيب الطاش
والعروس تقطع فى اللحمة والدموع سايلات و000سايلات
والمكياج اخر لخبطة وريحته بقت بصل بصل
غايتو حاله ما يعلم بيها الا الله
العروس قررت من صباح الرحمن تمشى بيت ابوها تطلب الطلاق
دا من اول يوم عمل فينى كدة بعد سنة يعمل شنو طلاق طلاق -
الجماعة الضيوف بهناك اخر ونسه وضحك وتعلقات مع العريس
بعد شوية الاكل جهز والجماعة اتعشو واستاْذنوا عشان يمشو
--العريس يا جماعة تمشو وين كلها ساعات والعين تشوف
--والله تانى ولا دقيقة مع السلامة وبيت مال وعيال وتصبح على خير ---
المسكينة جوة غرفتها راقدة على السرير بدون حتى تغسل يديها
ريحتا تقول جرسون من جرسونات مطاعم السوق الشعبى
تندب فى حظها المعيسير
بعد شوية دخل عليها العريس ورمى فوقها رزمة ورق كبيرة من الجنيهات
--- سجمى دا شنو
---دى خمسون مليون حقتك
---حق شنو سجمى انت مجنون عديل وانا ما عارفه
--دى مشاركة اصحابى فى زواجى والمبلغ دا كله هدية منى ليك
لموقفك الجميل معاى ولانك رفعتى راْسى واكرمت ضيوفى فى ليلة عمرك-
انبسطت البنية وتحول البكاء الى ضحك وقرقراب وجرى على الحمام وشنطة المكياج
وبداْت رحلة السعادة
|
| |
|
???? زائر
| موضوع: رد: عفيت منك يا بت الرجال الخميس يوليو 23, 2009 2:14 am | |
| |
|