دار جعل

زائر

جنازة الفكى مدنى

الفكى
مدنى مرضان فى الخلوة اتوفى هنا . دى خلوتو فى الفرحي . بعدين اولادو
شالوهو ودّو فى الخلوة ديك . ولدو قال لى امّو هو استحضر سألنى قال لى :
أمحمدقتّا لى : آى ياباقال لى : انا ما برقد هننا . برقد مع جدى اب قيد فى
السانتيقا دحين ما يجوك الكليّاب يقولو ليك بركتنا ما بنوديا السانتيقا
.قال استحضر و مات و شييعو الخبر و اتجمعو الناس فوق و اتخالفو .واحدين
قالو نودى خلوتو ديك ، و بعضهم قال يدفنو قبلو . اخوهو سأل ابونا قال لو :
ابوك وصاك بى وصية ؟قال لو : نعم قال لو : قال لك شنو ؟؟قال لو : قال لى
انا ما بندفن فى ام قرقور و ترابن ما شالن ابوى ما بمسكنى . دحين انا
بندفن مع جدى اب قيد فى السانتيقا.بعدين قال لى : غسلو و شيلو على خلوتو ،
ان تبعكم ودو على ام قرقور ، و ان ما طاوعكم شيلو كدى كمان ان يتبعكم كدى
كمان امشو معا . شالو مرقو بّرا و دنقرو على العنقريب يشيلو يجيبو جاى ابا
يقوم - ساجو فيهو ابا يقوم .بعدين قال لهن : كدى شيلو كدى شالو كدى بى
وشّو قام من هنا ، ابونا كوفر ، جابولو حمارآ ركبّوهو ، و العنقريب فات .
و الجواد ركبّو فوقا ود اخوهو ، بقول لو الحضرى قال لو اجر قدام اد الخبر
. العنقريب صبقو .لما وصل هناك ود خالتو بقولولو الفكى احمد ود اب قمزه ،
حلتّو تحت فى قاندتى و المتربة فوق . داك قال لهن : الليلة الفكى جايكن
قشو الخلوات . ديل ظنّو الفكى جايهن فى حالتو الصح قامو قشو المسيد عينون
على النعش جا . فتحو الخلوه و دخلوهو . لامن الناس خلّوهن اتجمعو و بعدين
انتبهو فى الغسل ، الباب ابا ينفتح ( الكلام ده كلو فى يومو ) ، الفكى
احمد ده ود خالتو جاهن قال لهن : يا اولاد الفكى ، الفكى اخوى ود خالتى و
انا و ياهو بيناتنا فى عهد ، ان مات قبالى اغسلو و ان متا قبالو يغسلنى .
دحين و الحق ليكن انتو ان عظمتونى بدخل اغسل .قال لو : امشى غسّل .ده جا
للخلوة انفتحت . لما دخلو لى الغسل معاهو الفكى احمد ود الزمزمى حوران
ليهو من الفرحين قال اول ما جابو الماء و مسك ايدو فتح نظرو سمع بعدين قال
لو : الفكى انتا نسيت العهد البينى و بينك . ما قت لى غسلنى ختا نظرو فى
بكانو و غسّلو و شالوهو ودو المدفنة . ده الشى الحكو لينا

نماذج من حكايات الجعليين الشعبية 3

(3)

المك نمر

قالو
البطاحين كتلو ولد ود اب سن و اتحوّو المك ، و اب سن جا راحل نقارتو تخبت
( تخبط ) . و المك ماخد منهن مرة ماخد شمّة بت ود دكين جايب منها عمارة و
خالد . و النقارة نقرت و المك ابا يتحرك اصلو ، لحد ما اتغامزوا الجعليين
. العرب ديل يسمّعونا دق نقارتن . العرب بتاعين الحليب اصلو قالو المك
مصلصن راقد تب فوق عنقريبو . قالو ما بتحرك. بعدين قالو لى الوتيد : نديك
كذا كذا كذا الراجل ده حركو ، التلوجة دى ال أبت تقوم دى ، ما تدى ، سنّو
قالو الوتيد اتحزّم و جا وقف بعيد شايل مطرقو قال لو : اللمت ( اتلمت )
جهينا و بادر ام بادريه لا تغششك فراستن الحليب و رعيه فوق حوض الصهب كيف
نشرب الجهينا فوق فرع النمر كيف تنزل القمريه قالو المك كسّر العنقريب
رضرضو . مرتو بت ود دكين قلو سمعت الوتيد وكت قالو : لا تغششك فراستن
الحليب و رعيه فات . ديل ، الوتيد همّا . قالو جاهو صاد قالو لو : يا
ارباب بت ود دكين الليلة وجها معاى كعب خلاس . قالو لو : ما نبذّتا بواتا
قالو لو : عاد الراى كيف انو ؟؟ هو ان ما امرو مايقدر يجيب كلمة ، الغنّاى
ان ما امرو ده ، البغنى لو انتا ما تمشى تغنّى بلا اذنو ، الا تستأذن منّو
. يقول لك : قول مسامح بعدين قالو لو : انتا ماك انجيب و غنّاى ما تنفك .
قالو اصبح الصباح جاها . لقاها صارّة وجها . وقف قدّاما قال لها : سلام
عليك يا بت عماره . ادتو بى راسا . قال لها : احمد الله الكريم الليلة
جاتنى بشارة . و على تكل الفريق تحققن النقّاره دى اخت اولاد دكين القدّر
القهاره جيد يا ارباب اخد شمّه اللى ابوها عماره قات لو : من دى عفيناك .
اها عقب انحجزو ، حجزون . غنّاى اب سن حجز و ده حجز . انجيب اب سن قالو لو
: انظر لى عمارة و خالد و حققنا الخال شريك الوالد اصالحو على كدى :
الشكرية رجعو و المك رجع .

نماذج من حكايات الجعليين الشعبية

( 1 )" بير سعد الله "

قالو
فى سخلتين و قمريتين و حمار ، و القمريتين ديل عندهن عيش ، قالن للحمار :
احرس لينا العيش ده .مشن كده و جن لقنو مافى .قالن لو : العيش وين ؟قالهن
: انا اتلفت كدى و جيت لقيتو مافى . بعدين اتشاكلو و كلو واحد قال للتانى
اتا اكلتو .قالن لو : ارح لبير سعد الله نحلف فوقو .جات القمرية قالت :قوق
قوق !اكان اكلتو يرمينى الله فى بير سعدالله و نطتجات القمرية التانية و
قالت :قوق قوق !اكان اكلتويرمينى الله فى بير سعدالله و نطت جات السخيلة
قالت :ميع ميع !اكان اكلتويرمينى الله فى بير سعد الله و نطت جات السخيلة
التانية و قالت :ميع ميع !اكان اكلتويرمينى الله فى بير سعد الله و نطتجاء
الحمار و قال :ها ها !اكان اكلتو يرمينى الله فى بير سعد الله و
نطابببببببببببب وقع فى البير